Au collègi calandreta de Pau

Lo Collègi Calandreta de Gasconha qu’ei obèrt a Pau

Cinc ans que l’associacion portadora d’un Collègi Calandreta en Gasconha e’s pelejava. Los esfòrçs e lo tribalh que son recompensats en aquesta rentrada de 2005 dab la soa obèrtura au 19, arrua Léonard Constant a Pau. L’obèrtura que’s hè un an après lo recrutament de Martine Ser, cargada de mission.

Un quarrat d’èrba, un pomèr, un higuèr Dens ua maison de pè dab un quarrat d’èrba, un pomèr, un higuèr e flors, la classa de sheisau : Estela, Maeva, Elisà, Pèir-Enric e Sacha, qu’a bon ambient e un arsec qui hèn plaser.

Arron lo de Grabels (Erau) qu’ei lo dusau collègi Calandreta. Que perpausa l’ensenhament en immersion en occitan a mainats qui an jà 8 o 9 ans d’escòla calandreta e que vòlen perseguir lo cursus escolar en occitan.

Aqueth establiment qu’ei la sola creacion augan tà Gasconha. Las finanças que son las de l’associacion, deus donators, e de las collectivitats departamentaus e regionaus.
L’Equipa pedagogica

Lo projècte qu’ei portat per ua equipa pedagogica de tria, professors de collègi o d’universitat peus quaus ei hòrt motivant de’s confrontar a l’ensenhament en immersion dab la pedagogia institucionau Calandreta. La màger part ne la coneishen pas mes ne demandan pas qu’a utilizar-la.

Quitament se las condicions materiaus ne son pas luxuosas, collegians com ensenhants, animators o associatius que’s declaran encantats d’aver l’escadença de participar au projècte.

Bernat Cazenave professor d’istòria-geò e director qu’a començat en encoratjar tot lo monde a har estauvias d’energia, de bens : lo papèr, lo carton, lo plastic, lo minjar, a pensar los sons abituds cap a d’aquera question e a observar abituds navèths en aqueste maine. Las mestiors ensenhadas e los programas que son los medishs com dens un establiment classic.

Com son mainats bilingües, la reflexion deu Collègi calandreta qu’ei d’auherir a eslhèves, duas lengas estrangèras tanlèu la sheisau : castelhan (Francés Lassabe) e anglés (Morag Landi-Munro). Los cors que’s tienen en castelhan e en anglés.

Cooperacions

Ua cooperacion priviletgiada ei organizada dab Calandreta Pau qui ei a 5 minutas a pè (informatica, cantina, espòrt).

Lo professor, J.-M. Souverbie professionau de rugbí qui s’ei hicat a parlar occitan tanlèu lo prumèr dia.

Qu’a com collèga L. Dubertrand qui perpausa cors de dança a partir de las danças tradicionaus de qui son jà familiarizats los collegians.

En matematicas e sciéncias e vita de la tèrra, E. Cros (jornalista a La Setmana), ancian professor au collègi calandreta de Grabèls que torna préner servici. Lo professor de tecnologia tot fresc recrutat qu’ei tanben occitanòparlant. Los cors de francés que seràn assegurats per M. Souverbie, qui ei presentament en congets maternitat, remplaçada taus tres prumèrs mes per C. Chapduelh.

L’occitan qu’ei desliurat per F. Biu qui harà tanben lo latin l’an d’après taus cinquaus : un deus sons grans sauneis ‘poder har lo cors de latin en occitan’.

L’equipa qu’ei completada per I. Morlaas-Lurbe taus arts plastics e J.F. Tisnèr (president de l’associacion), artista professionau, tà la musica. Un grop de professors dinamics, qui an hami d’ensenhar tanben d’ua faiçon innovanta en pensar projèctes transversaus qui hiquin a contribucion d’autes professors-acompanhants tà viatges de descobèrta e d’estudi. Un vertader tribalh en pregondor qui serà profieitader aus collegians.

Aqueths que son estonants, per exemple per la consciéncia hòrta de çò que pensan deu Collègi calandreta : ua escadença grana tà d’eths ; per exemple per la rapiditat qui an avut de formar un grope coërent e hòrt agradiu.

Motius de satisfaccion tà un projècte qui a jà gahat ua bona dinamica.

Augan los eslhèves que vienen de Pau, de Tarba, de Lescar e d’Auloron. Los de Pau que hèn familhas d’arcuelh lo diluns e lo dijaus sers taus que son mei luenh. Lo diluns e lo dijaus los cors que començan a 9h tà deishar lo temps d’arribar.

Los pairs que’s declaran encantats de véder los mainats urós d’anar dens aqueste collègi e quitament se tà d’eths ei un esfòrç, qu’ei prumèr ua causida e ua afirmacion qui representan hòrt.

Tà trobar las solucions menshs onerosas l’imaginacion qu’ei au poder.

Alavetz qu’an imaginat ua lista d’installacion / de vaduda deu Collègi calandreta de Gasconha. Se los uns o los autes e voletz dar çò que manca sapiatz que servirà. Que nse manca

 1. Un gran tablèu (lausa) tà fixar sus la paret + boisha tablèu (lo qui an sus pè que pren tròp de plaça)
 2. manhetoscòpa + tela tv + telecomanda
 3. lector de DVD
 4. lector de cd + tuner + manhetofòne + ampli + bafles
 5. fotocopiader
 6. retròprojector
 7. responeder
 8. fax
 9. tota publicacion a caractèr pedagogic (en occitan se’s pòt mes tanben en francés o en castelhan o en anglés o en catalan) 6au, 5au
 10. telas informaticas tà un hialat devath linux e un pòste servidor
 11. casièrs taus professors (format A4)
 12. tablèu d’aficatge tau burèu deus professors
 13. pintruras au litre o miei litre, papèr de dessenhar gran format blanc e de color, bròsas de pintrar, gredas grassas e pastèls secs per caishas de 12.

Enviatz-nse shens ve comandar un mail TA’NS HAR PART DEU VÒSTE DON

De har arribar au Collègi Calandreta
 Na Martine Ser
 13, arrua Léonard Constant
 64000 PAU
 05 59 32 05 39 (mercés per avança)

Tanben los dons que son acceptats :
 Collègi calandreta de Gasconha
 C/° Ostau biarnés
 46, Bd Alsace-Lorraine
 64000 PAU,
 un recebut que’vs serà adreçat tà la declaracion deus impaus.

MERCÉS PER LA VÒSTA SOLIDARITAT